1. oktober 2001

UKA 2001/32

 

A l l a n n g u u t i s s a t u t s i u n n e r s u u t

 

uunga

 

Inatsisartut peqqussutissaattut nr. xx xx xxxx 2001-imeersussatut siunnersuut Piginneqatigiilluni inissiat pillugit Inatsisartut peqqussutaata allanngortinneqaatigisassaa.
(Piginneqatigiilluni inissiaatileqatigiiffimmut taarsigassarsiassanik piffissaq tunniussivissaq)

 

Aappassaaneerneqarnissaanut Naalakkersuisunit saqqummiussaq.

 

§ 1-imut.

1. § 1 nr. 1-tip kingornagut nr. 02 nutaaq ikkunneqassaaq imatut oqaasertalerneqartussaq:

02. § 10, imm. 2 imatut oqaasertalerneqassaaq:
"Imm. 2. Inissianut § 1, nr. 1-imi pineqartunut taarsigassarsiarititassat tunniunneqartassapput inissiat inaarsarneqarnerisa kingornagut aammalu taamaallaat atuisinnaatitaalernermut allagartap uparuaavigineqarsimanngitsup takutinneqarneratigut. Inissianut § 1, nr. 3-mi pineqartunut taarsigassarsiassat siusinnerpaamik tunniunneqarsinnaapput inissiat inaarsarneqareernerisa kingornagut atuisinnaatitaalernermut allagartap uparuaavigineqarsimanngitsup takutinneqarneratigut, aammalu taamaallaat piginneqatigiilluni inissiaatileqatigiiffimmut pilersinneqareersimasumut peqqussutip aalajangersagartaasa sinnerinik naammassinnissimasumut inissiat tunniunneqarnerinut atatillugu."

 

2. § 1 nr. 2 tamatuma kingornagut § 1 nr. 3-ngussaaq.

 

§ 2-mut.

3. § 2 imatut oqaasertaliivigineqassaaq:

"§ 2.

Inatsisartut peqqussutissaat una atuutilissaaq ulloq 1. januar 2002. Peqqussutissaq Piginneqatigiillutik Inissiaatileqatigiinnut 2001-imut siusinnerusukkulluunniit Inatsisartut Aningaasanut Inatsisaannut ikkunneqareersimasunut sunniutissanngilaq.

Imm. 2. Piginneqatigiilluni Inissiaatileqatigiiffik 2001-imut siusinnerusukkulluunniit Inatsisartut Aningaasanut inatsisaannut ikkunneqarsimasoq imaluunniit Inatsisartut Peqqussutissaata matuma atuutilerfissaa sioqqullugu taarsigassarsinissamik neriorsorneqareersimasoq Namminersornerullutik Oqartussanut kommunalbestyrelsimullu nalunaaruteqarnermigut toqqarsinnaavaa Inatsisartut Peqqussutissaata matuma § 1, imm. 1, nr. 3-anut naapertuuttumik piginneqatigiilluni inissianik sananissap aningaasalersuiffigineqarnissaa."

Namminersornerullutik Oqartussat, ulloq xx. xxxx 2001

Jonathan Motzfeldt

/

Jørgen Wæver Johansen

 

 

 

 

Peqqussutissatut siunnersuummut oqaaseqaatit

 

Nalinginnaasumik oqaaseqaatit

Piginneqatigiilluni inissiat pillugit Inatsisartut peqqussutaat massakkut atuuttoq 1991-imi atulersinneqarpoq, taassumalu tunngavigalugu piginneqatigiilluni inissialiortarneq pillugu peqqussut siulleq 1989-imeersoq.

Piginneqatigiilluni inissialiortarnerup aallartinneraniilli Namminersornerullutik Oqartussat kommuunillu sananermut akeqanngitsumik aningaasalersuisarsimapput, tassa sanaartugassanut taarsigassarsiat sananerup nalaani naafferartunngorlugit tunniunneqarallartarsimammata. Naalakkersuisut nalilerpaat aningaasaleeriaatsitut neqeroorutigineqartartut imminnut uuttuuttuunissaat, taamaalilluni siunnerfigineqanngikkaluamik pissarsissutigineqartarnerat pinaveersaarniarlugu.

Taamaattumik siunnersuutigineqassaaq Piginneqatigiillutik Inissiaatileqatigiit sanatitsisutut allatulli sananerup ingerlanneqarnerani sanaartornermi aningaasalersuisarfinnit kiffartuunneqartarnissaat. Sananeq inaarneqarpat Piginneqatigiilluni Inissiaatileqatigiiffik Namminersornerullutik Oqartussanit, kommuunimit realkreditinstituttinillu aningaasaliissutinik pissarsitinneqartarsinnaavoq.

Peqqussutissatut siunnersuummik saqqummiussineq aaqqissuusseqqinnermut maanna ingerlanneqartumut atatinneqarpoq, aaqqissuusseqqinnerullu taassuma inernerissavaa Piginneqatigiilluni Inissiat pillugit nutaamik Inatsisartut peqqussuteqalernissaat, naatsorsuutigineqarporlu taassuma 2002-imi Inatsisartut Ukiakkut Ataatsimiinnissaannut Inatsisartunut saqqummiunneqarumaarnissaa. Peqqussutissatut siunnersuutip malitsigissavaa allaffissornikkut oqilisaassisoqarnissaa, tamannali aningaasatigut Namminersornerullutik Oqartussanut kommuuninullu sunniuteqassan-ngilaq.

 

Aalajangersakkanut ataasiakkaanut oqaaseqaatit

 

§ 1, nr. 1-imut

Aalajangersakkap imaraa Piginneqatigiillutik Inissiaatileqatigiit ataasiakkaat sanaartornerup ingerlanneqarnerani tamakkiisumik sanaartornermi akiliussigallartartunit saqqinneqartalernissaat, aatsaallu inissiat sananeqarlutik inerneqarneranni atuinissamut piginnaatitsissummik uparuaaffigineqarsimanngitsumik saqqummiussinermikkut Namminersornerullutik Oqartussanit kommuuninillu taarsigassarsiassaminnik tigusitinneqartalernissaat.

Inissialiorneq sanatitsisumit namminersortumit ingerlanneqarpat Namminersornerullutik Oqartussanit kommuuninillu taarsigassarsiassat aammattaaq aatsaat tunniunneqartarsinnaapput Piginneqatigiilluni Inissiaatileqatigiiffimmut pilersinneqareersimasumut peqqussutip aalajangersagartaanik sinneruttunik eqqortitsisimasumut inissiat tunniunneqarnerinut atatillugu.

 

§ 2-mut

Siunnersuutigineqarpoq allannguutit ulloq 1. januar 2002-imi atuutilersinneqarnissaat, taamaallaallu sunniutissallutik Piginneqatigiillutik Inissiaatileqatigiiffinnut 2002-mi kingusinnerusukkulluunniit Inatsisartut Aningaasanut Inatsisaannut ikkunneqartussanut.